أول بوست في مدونتي الجديدة ..حاجه محيره اوي...كل حاجه فجأه بقت جديده... المدونه,الكلية,الشقة,وحتي الكوتشي اللي انا ما ببطلش لبس فيه اتقطع و اضطريت اغيره؟؟؟؟بس ياتري يا هل تري الي اين تسير القافله؟
فجأه قالولي يا بنتي انتي هتروحي كلية حاسبات و معلومات عين شمس و طبعا اذبهليت كده..نعممم؟ بتقولو ايه؟ بتقولو ايه يا ولاد؟ حاسبات؟ معلومات؟يا حلاوه؟ و انا كان مالي و مال الكلام ده بس؟ وبما اني تور الله في برسيمو في الكمبيوتر ..فنا جاتلي الاول صدمه..و قلت احول فنون تطبيقيه بس الشيطان بقه لعب ف وداني و قاللي يا شيخه خلليكي في اللي انتي فيه بس و كبّري اخريتها ايه ما كده كده مسيريك بيت العدل(بالفتحة مس بالكسرة) و بصراحه ايام التحويل دي نمت و مدخلتش علي النت اصلا..و الحمد لله دلوقتي شيلت الليله و اتدبست خلاص ف بلا فخر احب اقول انا في حاسبات عين شمس ياولاد...و عشان تعرفوني اكتر لازم تعرفوا الناس ديبابا و ماما:
دكتور نصر حافظ استشاري امراض الصدر و رئيس قسم الصدر ووحدة التدخين(خللوا بالكو من دي اوي)في مستشفي احمد ماهر التعليمي
راجل حنين اوي اوي بس برج الاسد مأثر عليه حبتين من مواليد شهر 8 سنه 57(تقريبا)بيحب تربية الحمام و القراية و لانه مسلم بمعني الكلمه بيدي اللي يقدر عليه لخدمة دينه ..كل الناس بتحبه (وانا كمان)عشان مبيزهقش من مشاغباتب و بيسامحني من قلبه
دكتوره هناء محمد اخصائي امراض الصدر بمستشفي الدمرداش جامعة عين شمس
أمراه بقي حديديه طبعا مش هحكي عن تعبها معانا كلنا لان حجات اصلا في الخيال العلمي معرفوش يوصلولها..ربنا يقدرنا بقي و نعوضها شويه عن التعب اللي تعبته فينا..بالذات الايام اللي فاتت كانت حديديه فعلا لكن يعني اتغرّت شويه بس يللا عندها حق
دكتوره هناء محمد اخصائي امراض الصدر بمستشفي الدمرداش جامعة عين شمس
أمراه بقي حديديه طبعا مش هحكي عن تعبها معانا كلنا لان حجات اصلا في الخيال العلمي معرفوش يوصلولها..ربنا يقدرنا بقي و نعوضها شويه عن التعب اللي تعبته فينا..بالذات الايام اللي فاتت كانت حديديه فعلا لكن يعني اتغرّت شويه بس يللا عندها حق
العيله:
سدرة المنتهي اختي الخارقه للطبيعه الرقه و الحنان في اقوي انسان عقل و حكمه و بردو براءه و طفوله دي بقه حبيبي الاولاني و الحضن اللي مالوش تاني اللي هيعرفها هيحسدني عليها ربنا يقدرني و افرحها مدونة عظيمه بردو ربنا معاها في مشوار الثانويه العامه
ساجد ابو مخ متركب شمال اخويا العبقري جدا جدا لزيز بس ذكي زياده عن اللزوم ربنا يهديه يا رب بس انشاء الله مشروع طفل ناجح يعني حافظ 6 اجزاء من القران و جايب 99%في سنه تانيه ابتدائي يعني شغّال الواد بردو
دكتوره نشوه بنت خالتي العسل و السكر اوي اختي الكبيره بجد دماغ دماغ دماغ ربنا يحفظك يا رب و يهنيكي كده و اشوفك في الكوشه جنب سمير ان شاء الله قريب
احمد الهادي:غصب عني لازم اقولك شكرا
اصحابي بقه:
اولا.....ميار البكري انتيمتي و روح قلبي مقدرش انساها طبعا دكتوره المستقبل في اولي اسنان و اجمل وش برتاح ابص فيه ..كانت معايا علطوول في كل حاجه وواقفه جنبي و خايفه عليا بقولها بجد ربنا يخلينا لبعض يا احلي دكتوره
ثانيا...دينا عماد البير اللي مالوش قرار جارتي طبعا و اقدم واحده في الشله بقولها مبروك ان جاتلك تجاره عين شمس والله فرحت جداا انك هتروحي مكان انتي حباه ..و اتمنالك اجمل ايام انتي و علي و فعلا بجد ما قبلتش حد بيحفظ اسرار زيك
ثالثا...ساره عبد الناصر البت الروشه جدا جدا علي الاخر طبعا حبيبه قلبي في طب طنطا و اكبر دماغ فيك يا كفر الزيات بقولها انا حبيتك جدا السنه دي عن السنين اللي فاتت مش عارفه ليه ولو اني مبحبش الناس اللي بتجيب 99 في الميه دول عشان بيفكروني بالانتخابات اتمنالك ايام حلوووه و حلوه اوي انتي و..وللا بلاش
وبدون ترقيم سماء محمد عطا سارقه قلبي في اداب حلوان انا مش حطاكي في الاول يا بلوه عشان دايمن بتنفضيلي و انا اللي هموت عليكي لكن برضو ما انساش العيش والجاتوه اللي بيننا و ما استغناش علي اجمد شخصيه و اطول لسان دافع عني في كاريير حياتي كلها
رابعا...ايمان عماد مهندسة المستقبل صديقة الطفوله و البنت اللي اتمنيت فعلا اكون مكانها سنين طويله من رقتها و عسوليتها(بتتقال ازاي دي)عاوزه اشكرها من قلبي انها قدرت تحافظ علي صداقتنا رغم ما بعدنا عن بعض كتير اوي لكن فعلا صورتها من وهي صغيره مش بنساها ولا بنسي اليوم اللي سافرت فيه و جريت عليا بفستانها الابيض تودعني و هيا بتعيط ..من قلبي يا ايمي بحبك
خامسا..حضرة الهانم المهروشه جدا صحبتي النص مصريه و نص سودانيه فاطمه سمعت انها جت مصر ولا عارفه اوصلها بس ان شاء الله هلاقيكي يا مصيبه و ربنا يستر ماتكونيش خربتي الدنيا منغيري
سادسا...بشمهندسه بسنت رغم اني يا بنتي ما قابلتكيش كتير بس بحبك مش عارفه ليه يمكن عشان من ريحة الحبايب و للا باين عليكي لئيمه اصلا و ضحكتي علي عقلي المهم انك ف الاخر اختي جدا جدا ..بحبك يا شقيه
و طبعا ما ننساش سالي سمير المحاميه اللي هتقلب نظام القضاء باذن الله,و ايمان راشد دكتوره العلاج اللي لايمكن يكون طبيعي,وهبه الممثلة القديرة,مارينا وجدي الدكتوره المظلومه,وغيرهم و غيرهم من اللي اتورطوا و عرفوني
